Suldado nga nagtiro-patay sa kasubong nga suldado sa kampo sa Tapaz, Capiz, napasakaan na sang kaso nga murder; suspek, nagtuyo maglumpat halin sa salakyan samtang ginabiyahe padulong sa Prosecutor’s Office

Capiz — Napasaka na ang kaso nga murder batuk kay Private First Class Sargie Labao sang Mambusao, Capiz, matapos nga gintiro patay sini ang kasubong nga soldado nga si PFC Delio Sebarillo, tumandok sang Mandurriao apang naga-istar na sa Negros Occidental.

Ginconfirmar ni SPO3 Joseph Gallenero sang Tapaz Police Station nga nafile nila ang kaso kahapon.  Ginbuyagyag ni Gallenero nga gintuyo pa ni Labao nga buksan ang puwertahan sang patrol car agud maglumpat bangud ginpahayag sini nga may nagalagas sa iya apang napunggan siya sang mga pulis.

Pagkatapos nga ginfile ang kaso, ginhapit si Labao sa ospital agud mapakalma antes ginbalik sa police station.

Una na ginpahayag ni SPO4 Rufo Sarmiento, deputy station commander sang Tapaz Police Station, nga gin-ako sang asawa nga naconfine si Labao sa AFP Medical Hospital sa Quezon City sang Abril 14 tubtob Hunyo 20 subong nga tuig kag gin-diagnose nga may psychotic disorder.  Nakabalik sa duty si Labao bangud ginpahanugutan man suno pa sa asawa.

Mabulos kuntani si Sebarillo kay Labao sa guard post sa exit gate sang ila kampo sa Tapaz, Capiz sang Hulyo 19 sang kaagahon sang natabu ang insidente.

Indi makatulog sa presuhan si Private First Class Sargie Labao nga nagtiro patay sa iya kaupod nga si PFC Delio Sebarillo.

Nanotisyahan ini sang mga pulis suno kay SPO3 Joseph Gallenero sang Tapaz Police Station gani nga ginhapit nila sa ospital ang soldado agud mapakalma. Nagahambal si Labao suno kay Gallenero nga may nagalagas kag tuyo nga magpatay sa iya. Sa pagkamatuod suno kay Gallenero, nagtuyo nga maglumpat sa patrol car si Labao samtang ila ginabiyahe pakadto sa Provincial Prosecutor’s Office kahapon sang aga agud nga ifile ang kaso nga murder.

Nagkalma lang sa ospital si Labao sang nag-abot ang iya nga pamilya. Una na nga ginbuyagyag sang asawa ni Labao nga naconfine ang soldado sa AFP Medical Hospital sa Quezon City sang Abril 14 tubtob Hunyo 20 subong nga tuig kag gin-diagnose nga may psychotic disorder. Pero ginpasugtan man ini nga magbalik sa duty suno sa asawa. (JoMaque)