BABAYE NGA GINAPATIHAN MAY DEPERENSYA SA PAMINSARON, NASAPWAN NGA PATAY SA BANWA SANG SAN RAFAEL
San Rafael, Iloilo – Nasapwan nga patay sa likod sang barangay hall ang babaye nga ginapatihan may deperensya sa paminsaron sa Brgy. Bagacay, San Rafael alas 8:45 kahapon sang aga (Hulyo 22).
Suno kay Senior Inspector Kenn Albert Lepsia, hepe sang San Rafael Municipal Police Station, may pilas sang pagkabuno kag paglampos sa ulo ang biktima nga ginkilala kay alyas Prelyn, 26-anyos sang Brgy. Poblacion, San Rafael.
Ginpahayag sini nga ulihi nga nakit-an ang biktima sa may baylehan sa barangay sang Hulyo 21 sang kagab-i.
Ginhimuslan
Nagapati ang pamilya sang babaye nga ginhimuslan ang biktima antes ginpatay.
Ginkumpirmar ni Ana Mae, magulang sang napatay nga si alyas Prelyn nga may deperensya sa paminsaron ang iya manghod.
Gin-ako sini nga makapila na ka beses nga ginhimuslan ang iya utod bangud nga masami nga nagalagaw kag wala nagalisensya.
May tion suno sa iya nga ginagapos nila si Prelyn agud indi makalagaw pero nahukas sini gihapon ang gapos sa iya.
Suno pa kay Ana Mae, mabaton pa nila kon ginhimuslan ang iya utod pero kuntani wala lang ginpatay.
Ginpahayag ni Senior Inspector Kenn Albert Lepsia, ang hepe sang San Rafael Municipal Police Station nga ulihi nga nakita sang mga testigo si Prelyn sa baylehan kagab-i (Hulyo 21) nga ginpasakay sa motoriklo sang duha ka lalaki. (JoMaque)