Lalaki, patay san gintiro kag ginlabu sang mag-ugangan sa Calinog; daan nga hiligut-anon kag away sa duta, ginasunod nga anggulo sang police

Calinog, Iloilo–Patay ang lalaki nga gintiro kag ginlabu sang mag-ugangan sa Sitio Limontubig, Barangay Tigbayog, Calinog kahapon.

May pilas si Richard Copita, 44 anyos, sang pagkatiro sa dughan kag pilas sang pagkalabu sa liog. At-large naman ang mga suspek nga sanday Jobert Condes, 35 anyos, kag ugangan sini nga si Rannie Delos Reyes, 57-anyos.

Base sa imbestigasyon sang Calinog police sa pagpanguna ni Chief Inspector Jose Nemias Pamplona, nagabahug sang iya baboy ang biktima sang gintiro ni Condes gamit sang 12 gauge shotgun kag ginlabu ni Delos Reyes.

Ginasunod nga anggulo sang kapulisan ang daan nga hiligut-anon kag away sa duta. Nausisaan sang police nga bag-o lang nag-abot halin sa Manila ang biktima kag ginbawi sini ang ila uma sa mga suspek. (AGB)