Anay Libertad, Lapuz Punong Barangay kag subong Barangay Kagawad Sumakwel Nava, ginreklamo nga nagpa-untat paeskwela sa ila day care center sa tatlo ka pre-schoolers nga ginpahayag involved sa illegal drugs ang ginikanan; Nava, nagrason nga ginalimpyuhan lang ang ila barangay sa mga tawo nga may indi maayo nga record

Iloilo City–Ginreklamo ang ginpahayag pagpa-untat eskwela ni Libertad Lapuz anay Punong Barangay kag subong Barangay Kagawad Sumakwel Nava sa tatlo ka pre-schoolers bangud ang ila ginikanan ang ginpahayag “na-involved sa illegal nga druga, lampingasan kag patay huya.”

Suno kay Trecy Longno, nanugid sa iya ang iya bayaw nga nagsulod sa Day Care Center si Nava sang nagligad nga semana kag nangyawyaw. Naghambal pa si Nava nga dapat maagi sa iya ang mga naga-eskwela.

Ginpakuha sini ang listahan sa maestra kag may tatlo ka kabataan nga ginpa-untat eskwela suno kay Longno. Nalakip sa tatlo ang hinablos ni Longno nga naga-edad sang tatlo ka tuig nga bag-o lang napatyan sang amay.

Ginkwestyon ni Longno kun ano nga laye ang nagahambal nga dapat salaun anay sang barangay official ang mga naga-eskwela.

Ginhinambit ni Longno nga indi dapat pag-ulamiron sa away pulitika ang mga bata. Gin-ako ni Longno nga may paryente ang bayaw niya nga nakontra ni Nava sa pagka-punong barangay sang una.

Sabat ni Nava

Nagdepensa si Nava nga ginsuhestyun niya lang nga magkadto sa barangay hall ang ginikanan sang ginatumod nga mga bata agud diskusyunan ang polisa sang barangay.

Ginatinguhaan suno sa iya sang mga taga-Libertad nga “malimpiyuhan” ang barangay. Indi na suno sa iya masarangan sang Libertad nga i-akomodar ang mga bata nga ang ginikanan may record nga indi maayo.

Ginkwestyon man sini kun nga-a sa Libertad ginpa-eskwela ang bata bangud pila man lang ka metros ang kalayuon sang Jalandoni Elem. School sa balay sang nagareklamo.

Ginpanindugan pa ni Nava nga siya ang nagpaninguha para mapatindog ang Day Care Center. Indi man ini suno sa iya dapat paghimuon nga prisuhan sang mga gintokhang bangud masami nagakadto dire ang mga ginikanan nga may record. (AGB)