PRO 6 Director John Bulalacao, nagdayaw sa mga nahimo ni Councilor Plaridel Nava sa kampanya kontra illegal nga druga

Iloilo City–Gindayaw ni Police Regional Office 6 Director John Bulalacao ang mga nahimo ni Councilor Plaridel Nava sa kampanya kontra illegal nga druga.

Kasunod ini sang ila pag-istoryahanay sa Camp Delgado kahapon nga gintawag ni Bulalacao nga “simple meet and greet activity.”

Suno kay Bulalacao, dapat nga mangin abyan niya ang konsehal  bangud desidido ini nga magbulig sa PNP kampanya kontra illegal nga druga.

Ginpahibalo ni Nava kay Bulalacao ang mga accomplishments sini sa konseho kag mga output sini angut sa kampanya kontra druga antes pa man nagpungko si Presidente Rodrigo Duterte sa puwesto. Nagalaum si Bulalacao nga madamu pa kuntani sang pareho ni Nava agud lubos nga masolusyonan ang problema sang illegal nga druga.

Gin-athag naman ni Bulalacao nga maga-agi sa maid-id nga validation process ang tanan nga impormasyon nga ginpalab-ut sa iya.

Una na ginpahayag ni Nava nga may ginhatag siya nga folder kay Bulalacao nga naga-unod sang mga dokumento sang mga ginpahayag involved sa illegal nga ginalakipan sang mga politiko kag police. (AGB)