Bag-o Nga Mga Hepe Sang Mandurriao Kag Lapaz Police Stations, Nagsugod Na Pagpangalagad

Iloilo, Western Visayas — Nagpungko na ang bag-o nga mga hepe sang Mandurriao Police Station, Arevalo Police Station kag Lapaz Police Station.

Suno kay Police Regional Office 6 Director Chief Supt. John Bulalacao, indi siya kumbinsido sa performance sang daan nga mga hepe nga iya ginpang-relieve gani wala ginpasugtan ang apelasyon sang Iloilo City Police Office.

Nagbulos kay Chief Inspector Juvy Navales sa Mandurriao Police Station si Chief Inspector Engelbert Banquillo nga deputy chief sang Iloilo City Mobile Force Company. Si Chief Inspector Ariel Pico halin sa Negros Occidental Police Provincial Office ang nagbulos kay Senior Inspector Jose Val Ladublan sa Lapaz Police Station samtang si Senior Inspector Eduardo Siacon Jr nga team leader sang ICPO SWAT ang nagpungko nga bag-o nga hepe sang Arevalo Police Station tal-us kay Senior Inspector Mary Grace Borio.

Si Navales ang ginsaylo sa Bacolod City Police Office, si Ladublan sa Antique kay si Borio sa Aklan Police Provincial Office.

23 ka chiefs of police sa Western Visayas ang gin-reshuffle ni Bulalacao bangud indi maayo ang performance sang Hunyo sang siya na ang nagpungko nga PRO 6 Director. Apang ginreconsider ni Bulalacao ang mandu sa mga hepe sang Bingawan, Mina, Leon kag San Rafael kasunod sang apelasyon ni IPPO Director Marlon Tayaba.

(ATT)