4, nagreklamo nga biktima sang riding-in-tandem nga nagpang-snatch sang cellphone sa nagkalain-lain nga lugar sa syudad
Iloilo City–Apat ang nagreport sa mga police stations sa siyudad nga biktima sila sang riding-in-tandem nga nagapang-snatch sang cellphone.
Una nga natabu sang Hulyo 28 sang gab-i. Nagreklamo si Larry Guardiano sang Lapaz matapos gintuyo sang riding-in-tandem nga i-snatch ang iya cellphone samtang nagatindog siya sa kilid sang karsada sa Magdalo, Lapaz, pasado las 10 sang gab-i. Nahulog sa karsada ang iya cellphone balor P9,000 sang gintuyo agawon sang angkas sa scooter nga orange ang color. Gilayon nalagyo ang mga suspetsado sang nahulog ang cellphone ni Guardiano. Wala nataban ang cellphone ni Guardiano.
Las 12:30 naman sang kaagahon sang Hulyo 29 sang nakuhaan sang cellphone si Jessa Pelayo sang Bacolod City pero temporaryo nga naga-estar sa Gustilo, Lapaz. Nakuha sa iya ang iya cellphone nga nagabalor sang P17,000. Nagalakat si Pelayo sa Gustilo Street sang nagdulog ang motorsiklo kag gin-agaw sang sakay sini ang iya cellphone. Nagpalagyo ang mga suspetsado sa Jereos, Lapaz area.
Makaligad ang pila ka minutos, las 12: 55 sang kaagahon sang Hulyo 29, nagreklamo naman si Mellia Entredicho sang Guimaras, temporaryo nga nagatenir sa Brgy. Balabago, Jaro kag nagatrabaho bilang therapist sa spa sa city proper matapos gintuyo man agawon ang iya cellphone samtang nagabantay siya sang jeep sa dalum sang fly over sa General Luna. Nahulog ang cellphone sini kag madasig man nga nagpalagyo ang mga suspetsado. Wala nadala ang cellphone.
Las 11:00 sang gab-i sang Hulyo 29 man sang gin-snatch ang cellphone ni Danica Casidsid sang Navas, Aklan pero naga-estar temporaryo sa Mission Road Extension, Jaro. Nagalakat ini sa Luna St., Lapaz halin sa computer shop sang ginsugata siya sang lalaki nga sakay sa tangkal-tangkal kag gin-agaw ang iya cellphone balor. (AGB)