Media man sa Antique, nagtawag nga overkill ang pag-aresto sa iya bangud sa online libel

Hamtic, Antique–Ginakabig sang media man nga si Sherwin “Ontoy” Pacete nga overkill ang pag-aresto sa iya sang kapulisan samtang nagaprograma siya sa DYJJ Radyo Natin Hamtic sang Hulyo 27.

Ginsaysay ni Pacete nga pito ka naka-sibilyan nga nagpakilala taga-Regional Anti-Criminality Action Team nga ginapamunuan ni Supt. Romeo Baleros ang nagserbe sang warrant of arrest. Napilitan si Pacete nga maguwa sa announcer’s booth kag gin-atubang ang mga nag-aresto sa iya bangud gusto sang mga ini nga sudlon siya sa booth. Naguwa si Pacete sang nagpakato ang Hamtic police nga nag-assist sa pagserbe sang arrest warrant.

Ang warrant of arrest may kaangtanan sa kaso nga online libel nga ginfile ni Antique Congressman Paolo Javier sa Quezon City Prosecutor’s Office.

Ginkwestyun ni Pacete nga pito gid ka wala naka-uniform ang nag-aresto sa ila kag wala sang koordinasyon sa local police. Ginposasan si Pacete kag gindala sa police station bilang standard operating procedure suno sa police.

Nagpanawagan si Pacete kay PRO 6 Director John Bulalacao nga aksyonan ang natabu sa iya. Naka-piyansa na si Pacete. (AGB)