(UPDATE) Kontrata sang contractor sa delay nga road project sa San Antonio, Molo liwat ginrekomendar sang DPWH Iloilo City nga i-terminate

Iloilo City–Ginrekomenda ni Engineer Rodney Gustilo sang DPWH Iloilo City District Engineering Office ang pagterminate sa kontrata sang Legacy Construction nga delayed ang pag-obra sa San Juan Street, Brgy. San Antonio, Molo.

Base sa recommendation letter, natapos na sang Agosto 5 ang 45 diyas nga ginhingyo sang contractor nga tyempo para tapuson ang proyekto apang wala gihapon makumpleto.

Isumiter ang amo nga rekomendasyon kay Department of Public Works and Highways Vi Director Wenceslao Leaño Jr. para sa iya pinal nga desisyon.

Ginpahayag naman ni Gustilo nga irekomenda man niya ang pagblacklist sa Legacy Construction.

BACKGROUND

Hunyo 19 sang nag-expire ang revised expiry date sang kontrata nga nagabalor sang Php 21, 182, 958.61.

Nag-issue sang notice for temination ang ICDEO sa contractor sang Hunyo 11. Hunyo 21 naman sang naghigyo sila nga ireconsider ang notice of termination. Dugang diri, nagpasalig man ang contractor nga tapuson ang proyekto sa sulod sang 45 diyas.

Ginkonsider ni Gustilo ang motion for reconsideration sang contractor kag ginpahanugutan man ang ila pasalig nga 45 diyas.

Suno kay Gustilo, ginreconsider niya ang termination sa kontrata bangud mas malip-ot ang tyempo nga ginpasalig sang contractor para tapuson ini ipaanggid sa tyempo sa pagproseso sang termination sang kontrata nga indi magnubo sa duha ka bulan.

Dugang niya, wala pa nalakip diri ang pagbidding sa nabilin nga ulubrahon sa proyekto kag ang tyempo nga italana sa pag-obra sini.

Hulyo 30 nagrequest si Gustilo sa city government sang partial road closure sa lugar para makabkab na sang contractor ang karsada.

Agosto 6 sang nag-issue sang executive order si Mayor Joe Espinosa natuhoy sa lihok nga nagsugod subong nga adlaw, Agosto 7, tubtob Agosto 20. (AGB)