Bag-o nga PDEA 6 Director, nagpasalig nga magatutok sa pag-operate sa mga identified drug personalities sa Western Visayas

PDEA 6, Iloilo City–Pagatutukan sang bag-o nga regional director sang Philippine Drug Enforcement Agency ang pag-operate sa mga identified drug personalities sa Western Visayas.

Suno kay PDEA 6 Director Emerson Margate, gintugyan sa iya ni former regional director Wardley Getalla ang mga folders sa diin nabutang ang mga target drug personalities sang ahensya kag mga lugar nga ginakabig hot spots sang illegal drug activities. Lakip man sa ila tutukan ang mga newly-identified drug personalities.

Gin-athag ni Margate nga indi man sila mabudlayan sa operational aspect sang ila trabaho bangud indi tanan nga personnel sa Region 6 ang gin-swap sa Region 7.

May nabilin pa suno sa iya nga 12 ka personnel sa rehiyon kag may mga personnel man siya sa Region 7 nga na-assign sadtu sa Western Visayas.

Ginpabutyag ni Margate nga magahingyo sila sang bulig kay Getalla kon kinahanglan ilabe na nga naglain ang sitwasyon sang illegal drugs trade sa Region 6. (AGB)