Empleyado sa city hall, dakup sa buy bust operation

Iloilo City — Dakop sa buy bust operation ang regular employee sang Iloilo City Hall  sa Barangay Fatima, Jaro kagab-i, Agosto 10. Ginkilala ang nadakpan kay Winston Porras, 48 anyos sang Dela Rama, City Proper nga nakuhaan sang apat ka plastic sachets sang suspected shabu kag mil 600 pesos nga buy bust money.

Suno kay Chief Inspector Tranquelino Querubin Jr, hepe sang Jaro Police Station, madugay na nga ginamonitor sang pulis si Porras pero subong lang gid nadakpan. Nagakuha sang supply sang illegal nga druga si Porras sa Molo, suno kay Querubin kag kalab-anan sini nga customer mga commercial sex workers.

Si Porras ang Administrative Assistant 1 sang City Planning and Development Office. Magluwas kay Porras, nadakpan man ang kahimbon sini nga si Jerky Marie Jubelag sang Barangay Bolilao, Mandurriao.

Gin-ako ni Porras nga nagagamit siya sang illegal nga druga.  Nagpamalibad nga maghatag sang komento si Porras pero gin-ako sini kay Querubin nga umpisa siya nga nagagamit sang illegal nga druga sang naga-eskwela pa siya sa kolehiyo. (JoMaque)