Mag-live in, arestado sa buy bust operation; Masobra P300K nga balor sang shabu, narecover

Iloilo City — Arestado ang maglive-in partner sa buy bust operation sa Barangay Burgos, Lapaz kagab-i, Agosto 10. Ginkilala ang nadakpan kanday Karl Ellehcir De Guzman, 27-anyos sang Barangay Montinola, Jaro kag Catherine Villaruz, 22-anyos nga nakuhaan sang isa ka bulto kag duha ka magagmay nga plastic sachets sang suspected shabu nga nagabalor tanan sang masobra P300,000.

Narecover kay De Guzman ang P2, 200 nga buy bust money. Ginhimo ang operasyon sang Regional Drug Enforcement Unit sa pagpamuno ni Police Senior Inspector Kennith Bermejo.

Suno kay Bermejo, nakabaton sila sang impormasyon nga may nag-abot nga items halin sa Manila gani naghimo sila sang surveillance tubtob nakahimo ang ila asset sang transaksyon kay De Guzman.  Suno pa kay Bermejo, madugay na nga involved sa illegal drugs si De Guzman kag may kaso na sang una apang na-dismiss. (JoMaque)