(UPDATE) Pamilya sang 7 ka napatay sang mga pulis kag soldado sa operasyon sa Antique, nagpahayag nga barbaro ang pagpatay sa ila himata; Philippine Army, nanindugan nga lehitimo ang operasyon nila kag indi masaker
Iloilo City–Masaker kag indi encounter ang natabu sa pito ka nagkalamatay sa Barangay Atabay, San Jose, Antique kahapon sang kaagahon.
Pahayag ini ni Mr. Reylan Vergara, secretary general sang Panay Alliance Karapatan nga human rights group, base man sa ila kaugalingon nga imbestigasyon.
Sa press conference sa Iloilo City kaina sang hapon, Agosto 16, posible suno kay Vergara nga mahamuok ang katulugon sang pito sang gintata sang bala ang ila lawas kag brutal nga ginpamatay sang mga pulis kag soldado. Planted man suno kay Vergara ang mga narecover nga hinganiban sa area.
Lunsay patal ang igo sang mga napatay suno kay Ruth Salditos, asawa ni Felix Salditos sang Ilog, Negros Occidental nga isa sa mga napatay. Ginpahayag man suno sa iya sang mga empleyado sang punerarya sa Antique nga malapit ang pagtiro sa pito.
Luyag naman mahibaluan ni Indaluyon, Igbaras Punong Barangay Sonny Talibo kon ano gid ang natabu. Gin-ako sang punong barangay nga bata niya si Jason Talibo nga isa man sa mga napatay. Gin-athag naman sini nga wala siya nakahibalo sa ginsudlan sang iya bata kag nakibot man siya nga nakalab-ut ini sa Antique.
Magluwas kanday Salditos kag Talibo, patay man sanday Jason Sanchez, Karen Ceralvo, Liezel Bandiola, Eldie Labinghisa kag Peter Mecenas nga una na-identify kay Rene Yap.
‘Lehitimo’
Ginpanghiwala naman sang Philippine Army nga masaker ang encounter.
Suno kay Lieutenant Colonel Sisenando Magbalot Jr, commander sang 61st Infantry Battalion sang Philippine Army, ginsunod sang mga soldado kag pulis ang proseso sa pagserbi sang warrant of arrest apang ginhaboyan sila sang granada.
Gindepensahan lang suno sa iya sang mga otoridad ang ila kaugalingon agud malikawan ang casualties sa tropa sang gobierno.
Ginpahayag ni magbalot nga nagapangita lang sang rason ang NPA agud tabunan ang ila mga illegal nga aktibidad. Ang importante suno kay magbalot nga gin-ako sang NPA nga ila mga miembro ang pito ka napatay nga rebelde. (AGB)