Election protest ni Jose Martin Maloto batuk sa iya kasumpong nga si San Juan, Molo PB Pascual “Sipil” Espinosa, patas ang resulta

Iloilo City — Patas ang resulta sang recount sa election protest ni Mr. Jose Martin Maloto batuk sa iya kasumpong nga si San Juan, Molo Punong Barangay Pascual ‘Sipil’ Espinosa.

Base sa desisyon ni Municipal Trial Court in Cities Branch 1 Presiding Judge Anne Beatrice Aguana-Balmaceda, pareho nga nakakuha sang 2 mil 324 ka boto sanday Maloto kag Espinosa kag mahibaluan ang winner paagi sa drawing of lots sandig man sa nabutang sa Omnibus Election Code.

Sa resulta sang May 2018 Barangay elections, may walo ka abanse si Espinosa kay Maloto gani siya ang ginproklamar sang Commission on Elections nga punong barangay. Apang nagfile sang protesta si Maloto gani ginhimo ang recount.

Sa una nga desisyon nga ginpaguwa sang korte sang nagligad nga semana, gindismiss ang election protest kag gindeklarar nga nagdaug si Espinosa apang may nakita nga sala ang kampo ni Maloto gani nagreklamo. Sa desisyon nga ginpaguwa kahapon, naguwa nga patas ang boto nanday Espinosa kag Maloto. (JoMaque)