Lalaki nga nagataklos sang pusil kag nagsimpon sa rally sang Karapatan-Panay, ginpadakup sang grupo

Iloilo City — Gin-ako ni Iloilo City Police Office Director Henry Biñas nga pulis ang lalaki nga gin-aresto sang cause-oriented group bangud may taklos nga pusil sa ila rally kahapon, Agosto 24.

Suno kay Biñas, pulis sa Guimaras Police Provincial Office ang lalaki apang nagbalibad nga maghatag sang dugang nga detalye. Ginpahayag ni Biñas nga ginturnover sa iya ni Mr. Reyland Vergara sang Karapatan Panay ang 9mm nga service firearm sang lalaki. Apang wala man suno sa iya naghambal si Vergara nga arestado nila ang lalaki. Suno pa kay Biñas, ginbilin niya sa iya imbestigador ang pag-imbestigar sa natabu.

Alas-6 kagab-i, nagpa-blotter ang gintumod nga lalaki sa Police Station 1 kag nagpakilala nga si PO3 Arnel Failanga, 37 anyos sang Bakhaw, Mandurriao apang assign sa San Lorenzo Police Station sa Guimaras.  Nagreklamo si Failanga sang direct assault kag robbery bangud ginkuha ang iya service firearm.

Sa blotter report, ginpahayag ni Failanga nga naglabay lang siya sa Bonifacio Drive sa diin nagahimo sang rally ang mga cause oriented groups sang ginpalapitan sang grupo ni Vergara, ginpamangkot kon nagapanguha siya sang litrato kag ginbuligan rekisa tubtob nakuha ang iya pusil.

Mapasaka sang kaso ang grupo ni Vergara  batuk sa lalaki nga ila gin-citizens arrest bangud may bitbit nga pusil sa ila rally.

Ini matapos natukiban nga pulis ang ila arestado nga ginturnover sa Iloilo City Police Office..Suno kay Vergara, nakibot ang team nga iya ginpadala sa Police Station 1 bangud wala na ang lalaki kag wala nila nakuhaan sang pangalan. Ginpahayag ni Vergara nga gindumilian pa sang imbestigador nga magsulod sa police station ang ila kaupod nga may dala nga video nga ebidensya nila batuk sa lalaki.

Nakuhaan sang 9mm nga pusil nga issued sang Philippine National Police ang lalaki. Ginhatag ni Vergara ang pusil kay ICPO Director Henry Biñas.

Ang serial number lang sang pusil ang nakuha nanday Vergara. Ginpahayag ni Vergara nga mafile sila sang kaso bangud lapas sa laye ang pagbitbit sang law enforcer sang pusil sa vicinity sang mga nagarally. (JoMaque)