(UPDATE) PRO-6, nagpasalig sang bulig sa mga pulis nga napilasan sa paglupok sang IED sa Leon
Iloilo–Indi pagpabay-an sang Police Regional Office PRO 6 ang mga pulis nga napilasan sa paglupok sang improvised explosive device (IED) nga ginsundan sang engkuwentro sa Barangay Isian Victoria, Leon kahapon, Agosto 24.
Suno kay PRO-6 spokesperson PSUPT Joem Malong, luwas na sa katalagman ang tatlo ka pulis nga may mga minor injuries.
Ginbisitahan kag gin-istorya ni PRO 6 Director PCSUPT John Bulalacao ang mga personnel sang 1st Mobile Force Platoon matapos ang ila engkuwentro sa New People’s Army.
Isa sa tatlo ka napilasan ang platoon leader nga si PCI Abner Jordan.
Gindula naman ni Malong ang kahangawa sang mga pumuluyo sa lugar nga ginlutaran sang engkwentro bangud sa presensya sang mga rebelde. Suno sa iya, ginahimo sang kapulisan ang tanan agud mapabilin nga malinong kag matawhay ang rehiyon apang ginhingyo man sini ang kooperasyon sang publiko. (AGB)