Toyota Hilux, nagkaya sa tunga sang karsada

Iloilo City — Nagkaya sa tunga sang karsada sa General Luna Street, City Proper ang Toyota Hilux pasado alas-2 kaina sang kaagahon, Agosto 26.

Ginkilala ang driver kay Julius Ceasar Mira, 47 sang Jibao-an, Pavia samtang sakay sanday Leonard Apigorat, 31; Rhea Huertas, 22; kag Kimbonn Agodilos, 24, lunsay sang Simon Ledesma, Jaro. May mga gasgas sa lawas ang mga sakay kag wala na nagpa-ospital matapos nga ginbulong sang Iloilo City Emergency Responders.

Base sa pagpangusisa ni PO2 Van Eric Solarte, traffic investigator, halin sa Molo area pakadto sa City Proper area ang Hilux nga naglabay sa Jalandoni flyover sang na-alang-alang ang driver bangud nasilawan sang sugata niya nga salakyan.

Nasalakay sang Hilux ang mga misitera sa tunga sang karsada tubtob nga nagkaya sa atubang sang Police Station 1. (JoMaque)