Pulis nga nakuhaan sang pusil kag nagsimpon sa rally sang cause-oriented groups sang nagligad nga semana, pasakaan sang kaso
Iloilo City — Desidido ang cause oriented group nga BAYAN- Panay nga magpasaka sang kaso batuk sa pulis nga una nila ginreklamo nag-impon sa ila pikit kag nagkuha sang ila mga litrato samtang may sukbit nga pusil.
Suno kay Reylan Vergara, Deputy Secretary General sang BAYAN-Panay, ginaprepar na nila ang mga affidavit sang ila mga witnesses kag iban pa nga mga dokumento.
Paglapas sa Batas Pambansa 880 suno kay Vergara ang ipasaka nila batuk kay PO3 Arnel Failanga.
Nagapati si Vergara nga gintiktikan sang pulis ang iya grupo sang nagprotesta.
Ginpahayag naman ni Failanga nga assign sa San Lorenzo Police Station sa Guimaras nga naglabay lang siya sa lugar sang hinali siya ginpalapitan sang grupo ni Vergara, ginpamangkot kun nagapanguha siya sang litrato kag ginbuligan rekisa tubtob nakuha ang iya 9 mm issued firearm.
IBAN PA
Ginatun-an man sang BAYAN-Panay ang pagpasaka sang kaso batuk sa mga pulis nga nagresponde sa insidente matapos ginpahayag ginpapalagyo ang ginreklamo.
Suno kay Vergara, kaso criminal kag administratibo ang ginalantaw nila nga ipasaka batuk sa mga natungdan lakip si Iloilo City Police Office Director Henry Biñas.
Nagapati si Vergara nga hungod nga ginpapalagyo sang natungdan nga mga pulis si PO3 Failanga agud malikawan ang kahuy-anay ukon risgo sa makuha nila nga impormasyon.
SALIG-SALIG
Naghaum si Vergara nga aksyonan ni Biñas ang ila reklamo matapos nila ginturn-over sa police official ang ginreklamo lakip ang nakuha sa iya nga issued firearm apang nakibot sang nadiskubrehan nga wala naremit sa Police Station 1 si PO3 Failanga.
Wala na nakasabat pa si Biñas suno kay Vergara sang ginpamangkot sa status sang ila ginreklamo. (JoMaque)