Sa Alimodian, babaye, patay sang nag-inom sang hilo

Alimodian, Iloilo–Patay ang 30-anyos nga si Inday samtang naospital ang 39-anyos niya nga magulang nga si Nene matapos sila nag-inom sang hilo sa isa ka barangay sa Alimodian.

Suno kay Inspector Danilo Noca sang Alimodian Municipal Police Station, natabu ini kadungan sang birthday sang bata ni Nene sang Agosto 25 kag may inum-inom. Alas-6 sang gab-i, ginpahayag nga ginsaway ni Inday si Nene nga untatan na ang pag-inom pero wala ini nagpamati.

Naglakat si Inday kag gintext ang ila mga utod sa Manila nga “sila na lang ang bahala.”

Ala-1 kahapon sang kaagahon, Agosto 26, ginpahayag nakita na lang si Inday sa dalan nga patay na.

Nagpalupok sang buga ang mga residente bilang patimaan nga may emergency sa lugar. Pagkabati sang lupok, nagpinsar si Nene nga posible ang manghod niya nga si Inday ang involved ilabe na nga may tendency na ini magpanginmatay.

Ginpahayag nga nakunsensiya si Nene kag nagpangita man sang pesticide kag gin-inom.  Nahingagaw naman dala si Nene sa Aleosan District Hospital kahapon sang kaagahon kag yara na sa estable nga kondisyon. (AGB)