Pamilya ni Alex Blanca nga napatay sa buy bust operation sa Molo, nanginwala nga involved ini sa illegal nga druga

Iloilo City — Nanginwala ang pamilya sang subject sa drug buy bust operation nga napatay bangud ginpahayag nga nagbato sa San Juan, Molo kahapon nga involve ini sa illegal drugs.

Suno kay Chrisfield Blanca, ikatatlo sa lima ka bata sang biktima nga si Alex Blanca, 57 anyos, wala man sang armas kag granada ang iya amay.  Posible suno kay Chrisfield nga nasal-an lang ang iya amay kag ang iya magulang nga si Ruthfield ang target bangud ini ang may record sa ila lugar kag nagamit sang una sang illegal drugs.

Ginpahayag ni Chrisfield nga matapos nga gintiro ang iya amay, wala pa sila ginpaguwa sa balay kag nahimos na ang tanan sang ginpasugtan sila nga makaguwa.

Suno naman kay Senior Inspector Kennith Bermejo, team leader sang RDEU, newly-identified drug personality si Blanca kag wala pa nadala sa Barangay Anti-Drug Abuse Council ukon BADAC report sang San Juan kag kaiping nga Boulevard.

Sa intelligence report nga nabaton sang RDEU, downline si Blanca ni HVT drug personality Mohan Mino nga preso sa Iloilo District Jail.

Lakip sa recoveries ang lima ka sachets sang suspected shabu lakip ang buy bust item, 15 mil 200 pesos nga buy bust money, isa ka cellphone, isa ka m26 hand grenade, isa ka 38 caliber revolver kag anum ka bala. (JoMaque)