(UPDATE) Mayor Joe Espinosa, gintanyagan sang oposisyon nga mag-alyansa sa grupo para sa 2019 elections

Iloilo City–Ginhatagan sang opposition group si Mayor Joe Espinosa sang tubtub sa katapusan sang bulan agud magdesisyon kon magpakig-alyansa sa grupo para sa 2019 elections.

Suno kay Councilor Plaridel Nava, wala sila naga-pressure kag naga-blackmail sa alkalde kundi luyag lang nila nga mangin practical bangud indi puwede nga wala sang kandidato ang oposisyon. Ginpahayag sang konsehal nga sa tion nga mag-file sang certificate of candidacy si Dr. Pacita Gonzales, indi na ini mangin negotiable kag mangin 3-cornered fight ang mayoral race sa syudad.

Positibo gihapon si Nava nga may maayo nga development sa masunod nga semana matapos nag-ayo ang kampo ni Espinosa sang isa ka semana para makadesisyon.

Kon wala sang coalition kag wala na gid sang iban nga pilian, mapadalagan si Nava bilang vice mayor nga una nahisugtan sang ila grupo.

Ginconfirmar naman ni Mayor Espinosa nga may posibilidad nga maupod siya sa linyada nanday Councilors Joshua Alim kag Nava.

Suno kay Mayor Espinosa, naga-istoryahanay na sila sang nasambit nga mga opisyal apang ginpanginwala ini ni Councilor Alim.

Ginpahayag ni Espinosa nga bukas siya nga mag-istorya sa tanan kag ginafinalize pa sang iya grupo ang iya line-up sa eleksyon.

Una na ginpahayag ni Espinosa nga mapapili siya bilang alkalde sa 2019 elections bunggo sa iya bilas nga si Cong. Jerry Treñas. (AGB/ATT)