Bangkay ni Panay News publisher Danny Fajardo, iga-cremate antes dal-on sa Iloilo suno sa iya bata

Iloilo City–Abo na lang ni Mr. Daniel “Danny” Fajardo ang dal-un sa Iloilo.

Suno kay John Dan Elijah Fajardo, ikatatlo sa anum ka kabataan sang nagtaliwan nga Panay News publisher, gin-request sang amay sini nga i-cremate ang iya bangkay kag abo na lang ang dal-un sa Iloilo.

Nagtaliwan si Fajardo las otso kagab-i, Setyembre 10, sa Asian Hospital and Medical Center sa Alabang, Muntinlupa City pila ka adlaw matapos ini ginpaidalum sa bypass operation.

Nagtaliwan si Fajardo sa edad nga 72.

Si Fajardo ang founder sang Panay News sang 1981 kag host sang Reklamo Publiko program.

Si Fajardo ang nagserbe man sadto bilang presidente sang Iloilo Press Club kag nangin executive vice president sang Publishers’ Association of the Philippines.

Sang Setyembre 9 lang ini ginpasidunggan sang Mina bilang isa sa mga outstanding sons sa patag sang Negosyo kag Entrepreneurship. (AGB/MO)