3 PATAY SANG NABUNGGUAN SANG BUS ANG MOTORSIKLO SA TAPAZ, CAPIZ
Tapaz, Capiz – Patay ang tatlo ka mga solterito sang nabungguan ang ila ginasakyan nga motorsiklo sang ceres bus sa Poblacion, Tapaz, Capiz kaina sang hapon (September 11).
Ginkilala ang mga biktima nga sanday Alyas Lester, 16; Alyas Kenneth, 17; lunsay residente sang Brgy. Cristina; kag Alyas Ian, 15 sang Brgy. Initan.
Base sa imbestigasyon sang traffic section sang Tapaz Municipal Police Station, nabungguan sang Ceres bus nga ginamaneho ni Renato Sobreguel, 29 anyos sang Agtoman, Lambunao ang motorsiklo sang hinali nga nag-ulhot sa national highway.
Ginpahayag nga wala natalupangdan ni Sobreguel ang motorsiklo kag iya nabungguan.
Bangud sa kabaskugon sang pagkabunggo, nagtabog ang duha sa tatlo ka biktima samtang nagsuhot naman ang motorsiklo sa Ceres bus lakip ang driver.
Gindala pa sa ospital ang mga biktima apang gindeklarar nga dead on arrival.
Nagsungka naman sa Tapaz police ang suspek. (JoMaque)