Office of Civil Defense 6, nagapanghanda na sa pagsulod sang bagyo nga may posibilidad nga mangin supertyphoon

Iloilo City–Nagpasalig si Director Jose Roberto Nuñez, head sang Office of the Civil Defense 6, nga 100% nga preparado ang ila opisina sa mangin epekto sang bagyo ‘Ompong’ nga gina-forecast sang PAG-ASA nga magsulod sa Philippine Area of Responsibility buwas, Setyembre 12. Ginpahayag sang PAG-ASA nga may potential mangin supertyphoon ang bagyo.

Sugod buwas, 24/7 nga ma-operate ang operation center sang OCD 6 para mamonitor ang sitwasyon sang bagyo. May mandu man sa mga emergency responders kasubong sang Coast Guard, Bureau of Fire Protection, PNP, kag iban pa nga concerned agencies nga magreport sa OCD sang status sa ila mga areas of responsibility kada anum ka oras.

Gin-abisuhan man ni Director Nuñez ang mga local authorities sang kada banwa nga gilayon i-evacuate ang ila constituents nga naga-istar sa delikado nga lugar agud makalikaw sa disgrasya.

Ginpa-andaman man ni Nuñez ang publiko nga indi basta-basta magpati sa mga Facebook posts angut sa bagyo nga indi man matuod para malikawan ang panic.

Suno sa iya, sa mga lehitimo nga Facebook page lang dapat magpati kasubong sang PAG-ASA ukon sa mga radyo lang magkuha sang impormasyon parte sa bagyo.

Angut naman sa food supply sang mga posible evacuees, may mga sources na ang opisina kag may mga grocery stores man nga nag-commit para mag-supply sang pagkaon.

In-case of emergency, ari ang hotline sang OCD nga pwede i-contact sang publiko: 0949-180-6115, 337-6671, 336-9353.  (AGB/KJT)