Australian National, Ilongga business partner sini nga ginpahayag naga-engage sa cyber pornography, nadakpan sang ginserbehan sang search warrant sa Pavia

Pavia, Iloilo–Arestado ang Australian national kag iya business partner nga Ilongga matapos ginserbihan sang search warrant may kaangtanan sa pag-engage sa cyber pornography sa Pavia.

Ginkilala ang mga nadakpan kanday John Laffler, 69 anyos, kag Gladys Degala, 21 anyos sang Bakhaw, Mandurriao.

Suno kay Iloilo Police Provincial Office Director PSSUPT Marlon Tayaba, ginsulod nila ang balay sang foreigner sa isa ka subdivision sa Pavia matapos nakabaton sang impormasyon sa ila illegal nga negosyo. Naggamit sang police decoy ang IPPO agud mag-transaksyon online kanday Laffler kag Degala.

Naconfirmar sang IPPO nga ginagamit nga modelo ang mga menor-de-edad para sa cyber pornography operation sang mga subjects gani nag-apply ang police sang search warrant.

Ginpahayag ni Tayaba nga ginagamit nga modelo sang mag-business partner ang naga-edad sang 13 tubtob 16 anyos base sa ila profiles. Wala naman sang may na-abtan nga menor de edad ang mga otoridad sang ginsulod ang ginatineran nga balay ni Laffler.

Magluwas sa IPPO, kaupod man sa operation ang Pavia police, Inter-agency Council Against Trafficking, International Justice Mission, DSWD, Women and Children Protection Center Visayas kag Regional Anti-Cybercrime Unit. (AGB)