Amay sa nag-viral nga FB post nga daw ginamaltrato ang iya duha ka kabataan, gin-kustodiya sang Pavia police

Pavia, Iloilo — Natultulan sang Pavia police ang trisikad driver nga amay sa Barangay Malia-ao nga nagviral sa social media bangud sang mga litrato sini nga daw naga-maltrato sa iya duha ka kabataan.

Suno kay PO3 Phil America Algecera sang Women and Children’s Protection Desk sang Pavia Police Station, nanginwala ang 36 anyos nga amay nga ginamaltrato sini ang anum ka tuig nga bata nga lalaki kag apat ka tuig nga bata nga babaye.

Ginpahayag sang amay nga nagadugsing sila sang kabataan sang ginkuha ang mga litato. Kuha suno sa iya ang mga litrato sang Setyembre 11 sang aga kag ang bata nga lalaki man ang nagkuha sang litrato kag nagpadala sa iya iloy nga OFW.

Sa pagpangusisa ni Algecera, ang iloy naman ang nagforward sang mga litrato sa iya nga utod nga amo ang nagpost sa social media.

Ginpahayag naman sang mga barangay officials sa Mali-ao nga wala sang malain nga record sa ila lugar ang amay.

Gincustody sang Pavia police kag DSWD ang duha ka kabataan kag ginpa-medical check-up sa Western Visayas Medical Center agud mahibaluan kon ginamaltrato ang mga ini. Ginpa-idalum man sa psychological test ang amay. (JoMaque)