Engr. Rodney Gustilo sang DPWH-ICDEO , nagpamalibad nga magkomento sa subong sa delayed road projects nga gin-isyuhan sang notice of termination

Iloilo City — Nagpamalibad nga magkomento sa subong si DPWH ICDEO Head Engineer Rodney Gustilo angut sa mga delayed road projects nga gin-isyuhan sang Notice of Termination.

Suno kay Engr. Gustilo, ginatun-an pa niya ang mga probisyon sang layi natuhoy diri.

Matandaan, nagmandu si DPWH 6 Director Wenceslao Leaño Jr kay Engr. Gustilo sa pagsubmit sang ALJ Construction and Supply kag HF Enterprises sang ila Action Plan ukon target accomplishment kada adlaw tubtob nga makumpleto ang proyekto.

Ginrekomenda ni Engr. Gustilo ang pagterminate sa kontrata sang nasambit nga mga kontraktor lakip sang Audric Construction and Supply apang wala pa ini nadesisyunan ni Director Leaño tubtob subong.

Sandig sa Department Order 54 series of 2011 sang DPWH, ang regional director ang dapat magdesisyon sa termination sang mga kontrata nga tubtob 50 milyones pesos.

Base naman sa Annex I sang Implementing Rules and Regulations sang Government Procurement Reform Act, dapat desisyunan sang head sang procuring entity (Engr. Gustilo) ang termination sang kontrata sa sulod sang 10 ka calendar days sugod sang nabaton sini ang verified position paper sang contractor.

Setyembre 10 pa sang nagsumiter ang ALJ Construction and Supply kag HF Enterprises sang ila ‘position paper’ sa Iloilo City District Engineering Office.

Setyembre 11 naman ang Audric Construction and Supply. (JoMaque)