Paglitik kag pag-usmod sang duta sa Brgy. Carit-an, Patnongon, Antique, ginakahangaw-an sang mga residente
Antique – Nagakabalaka ang mga pumuluyo sa Brgy. Carit-an, Patnongon, Antique bangud sang pag-usmod kag paglitik sang duta sa porsyon sang bukid sa lugar.
Suno kay Dionisio Masola, 52-anyos kag pumuluyo sa lugar, halos duha na ka semana ang nakaligad sang nag-usmod kag naglitik ang porsyon sang duta sa ila lugar.
Nag-usmod sang ginabanta isa kag tunga sa dupa ang duta nga nagalapad sang tatlo ka dupa suno kay Masola.
Dugang niya, ginabanta sa tatlo tubtob lima naman ka dupa ang mga litik.
Kasunod sini, nagduag pula naman ang tubig sa sapa sa lugar suno kay Masola.
May mga pumuluyo na nga wala nagatulog sa ila balay nga nahamtang sa lugar bangud sa kakulba sa posible landslide.
Wala pa sang anunsyo ang mga barangay officials suno kay Masola natuhoy sa pag-evacuate nila kasunod sang sitwasyon.
Ginakuhaan sang Aksyon Radyo Iloilo sang pahayag ang Mines and Geosciences Bureau sang Department of Environment and Natural Resources apang wala pa sila nakahatag sang official statement. (JoMaque)