1 PATAY SA BUNGGU-ANAY SANG ELF TRUCK KAG CERES BUS SA SARA
Sara, Iloilo – Patay ang driver sang elf truck sang nakabunggo sa Ceres bus sa Aldeguer, Sara kahapon sang hapon (Oktubre 1).
Suno kay Senior Inspector Asencion Ortizo, hepe sang Sara Municipal Police Station, ginkilala ang napatay kay Regie Lozada, 40- anyos sang Natividad, Pilar, Capiz.
Sa imbestigasyon sang Sara police, nagasunod ang elf truck sa tricycle kag Ceres bus padulong sa direksyon sang Batad. Nagpundo ang bus kag nagpundo man ang tricycle kag posible naalang-alang ang elf truck gani nag-overtake sa bus kag tricycle nga naga-pundo.
Apang nakasugata niya ang isa pa gid ka Ceres bus nga padulong sa direksyon sang siyudad rason sang ila pagbunggu-anay. Posible suno kay Ortizo nga wala naka-seatbelt si Lozada bangud nag-awas ini sa windshield sang ginamaneho nga elf sang natabu ang pagbunggu-anay.
Gindala sa ospital ang driver sang nasugata nga Ceres bus, pila ka pasahero sini kag pahinante sang elf truck matapos nasamaran sa natabu. (JoMaque)