Atty Edeljulio Romero nga gintiro-patay sa Culasi, Roxas City, may duha ka patal nga igo sa ulo base sa resulta sang autopsy
Roxas City, Capiz (UPDATE) – Patal ang duha ka igu sa ulo ni Atty. Edeljulio Romero, ang abogado nga gintiro-patay sa guwa sang Culasi Port sa Barangay Culasi, Roxas City, sang September 28 sang hapon.
Ini ang resulta sang pag-autopsy ni Dr. Joe Martin Fuentes, medico-legal officer sang Capiz PPO Crime Laboratory, sa bangkay ni Romero.
Suno kay Fuentes, lima ka sentimetro ang distansiya sang duha ka entrance wounds sa ibabaw sang tangkugo ni Romero nga naglapos sa agtang kag sa nasal bridge area sa natung-an sang duha ka mata.
‘Bulls-eye’ kon si Fuentes pa ang pahambalon ang igu sang abogado nga posible bangud sa double tapping nga pagtiro kag nagapakita nga eksperto sa pusil ang gunman.
Wasak man suno kay Fuentes ang bagul ni Romero kag naigu pa ang utok sini.
Samtang matukod sang special investigating task group ukon SITG ang Roxas City Police Station agud matutukan ang pagtiro-patay kay Romero.
Si Romero ang abogado ni the late PDEA-indentified drug group leader Melvin Odicta. (JoMaque)