Panibag-o nga bomb threat, nagpuhag sa University of San Agustin kaina sang aga
Iloilo City–Liwat ginpuhag sang bomb threat ang University of San Agustin kaina, Oktubre 4.
Las-9 sang aga, gintipon ang mga estudyante sa football ground kag ginpangsiraduhan ang mga gates sang eskwelahan.
Ang mga estudyante nga iban wala naman ginpasugtan nga magsulod sa compound sang eskwelahan.
Gin-evacuate ang Mendel Hall lakip ang mga buildings malapit sa amo nga hall sa diin ginpahayag nabutang ang bomba.
Base sa inisyal nga impormasyon, may mga estudyante nga nakabaton sang text messages tuhoy sa pamahog nga may bomba. Gin-clear sang mga otoridad ang eskwelahan matapos wala sang nakita nga bomba sang ila gin-check.
Kahapon nakabaton man sang bomb threat ang eskwelahan. Base sa mensahe sa Facebook halin sa nagpakilala nga Felix Tan, ginpahayag ginbutang ang bomba sa Rada Hall pero wala sang nakita nga explosive ang mga taga-Explosive and Ordnance Division (EOD).
Antes sini, ginpuhag man sang hoax bomb ang Ateneo de Iloilo sa San Rafael, Mandurriao. (AGB/MO/NG/FE)