2 sa mga suspek sa pagpatay sa 9 ka sakada sa Sagay City, ginhingadlan sang PRO 6; Mga suspek, napasakaan na sang kaso

Negros Occidental — Ginpasaka na sang police ang kaso nga multiple murder batuk sa mga suspek sa pag-masaker sa siyam ka sakada nga miembro sang National Federation of Sugar Workers sa Sagay City sang Oktubre 20.

Gin-identify naman ni Police Regional Office 6 Director PCSUPT John Bulalacao ang duba sa mga suspek nga sanday Rene Manlangit kag Rogelio Arquillo nga pareho nga miembro sang NFSW kag iban pa nga John Does.

Gin-akusaran ang mga recruiters nga naglimbong sa mga biktima nga mag-upod sa ila asosasyon paagi sa pagpromisa sa mga ini nga mahatagan sila sang parte sa duta kon mangin madinalag-on ang ila kawsa.

Suno sa PNP kag AFP, gin-recruit ang mga biktima sang aga lang sang Oktubre 20. Gina-angut man sang mga otoridad ang pila ka miembro sang NFSW a New People’s Army nga ila gin-akusaran nga ara sa likod sang brutal nga pagpamatay.

Ginpahayag ni Bulalacao nga may walo sila ka testigo, lakip ang menor-de-edad nga nakaluwas sa pag-atake, nga nagtudlo sa mga suspek. (JoMaque)