PDEA 6, wala pa nakapa-athag sa nagsalangisag nga pahayag nila sang PNP angut sa ginpahayag presensya sang drug group sa syudad kag probinsya sang Iloilo

Iloilo City – Nagpamalibad nga magsabat sa subong ang PDEA 6 angut sa pahayag sang Iloilo Police Provincial Office kag Iloilo City Police Office nga wala sang drug group sa ila area.

Suno kay PDEA 6 Spokesperson David Garcia, i-validate pa nila sa police ang amo nga impormasyon.

Una nga ginpahayag ni Garcia nga may na-monitor sila nga drug group sa syudad kag probinsya sang Iloilo luwas pa sa nabungkag na nga Odicta kag Prevendido drug groups.

‘POSIBLE NAGBULOS’

Nag-ugat ang pagsalangisag sa pahayag sang PDEA kag PNP sang ginkuhaan sang Aksyon Radyo Iloilo sang komento si Garcia angut sa statement ni Police Senior Inspector Kennith Bermejo, team leader sang Regional Drug Enforcement Unit, nga posible ginbuslan ang Odicta kag Prevendido Drug Groups sang daan na nga drug group sa syudad.

Ini matapos namonitor sang RDEU nga nagdako ang drug operations sang wala ginhingadlan nga drug group.

Nagpamalibad pa si Garcia sa pagsabat natuhoy diri bangud wala pa siya naka-istorya sa ila Intelligence sang ginkuhaan sang pahayag. (JoMaque)