‘Onsehan’ sa illegal drugs kag ‘turf war,’ ginasunod nga anggulo sa pagtiro-patay kay retired SPO1 Ronaldo ‘Apol’ Alag

Iloilo City — (UPDATE) Lakip sa mga ginasunod nga anggulo sang kapulisan sa pagtiro-patay kay retired SPO1 Ronaldo “Apol” Alag ang “onsehan” sa illegal nga druga kag “turf war” ukon away sa teritoryo sa illegal drug trade.

Suno kay Supt. Jonathan Pablito, hepe sang Police Station 1, antes ginpatay si Alag, nagapadayon siya sa illegal drug transaction kon may chansa base sa ila impormasyon.

Magluwas nga konektado kay the late PDEA-identified drug group leader Melvin Odicta, ginpahayag ni Pablito nga konektado man si Alag sa Prevendido Drug Group paagi sa iya bayaw nga naga-apelyido Oribe.

Bisan nga yara suno sa iya sa prisuhan ang mga drug personalities nga konektado sa Prevendido Drug Group, may impormasyon nga ginapabugal pa nila nga kontrolado gihapon nila ang illegal drug trade.

‘PROFESSIONAL HITMAN’

Nagapati si Supt. Pablito nga professional hitman ang nagpatay kay Alag.

Makita suno sa iya nga wala sang kulba ang suspek sa pagtiro sa biktima kon basehan ang kuha sang CCTV camera sa lugar.

Posible man suno sa iya nga pangayaw ang mga suspek bangud wala sila sang may na-monitor nga guns-for-hire sa syudad.

Kun basehan suno kay Pablito ang profiling sang mga nadakpan nga hitman sa Iloilo, nagagamit sila sang 38 caliber kag isa tubtub tatlo ka lupok lang ang ginahimo kag madalagan na.

Pero sa nagtiro kay Alag, gin-ubos gid ang unod sang magazine sang pusil kag indi man mahambal nga first-timer kon basehan ang precision kag pagka-steady sang iya pulso sa pagtiro. (JoMaque)