14 anyos nga dalagita nga makapila ka beses na-rescue matapos naglapas sang Curfew for Minors ordinance, nagpromisa nga indi na siya maglagaw

Iloilo City – Suno kay alyas Inday sang Jaro, matenir na siya sa ila balay kag mabulig sa iya iloy nga si alyas Daisy, 33.

Ginpasakaan sang kaso sang Task Force on Moral and Values Formation ang iloy bangud apat ka beses na nga gin-rescue si Inday.

Kun mapamatbatan nga guilty si Daisy nga ginpabay-an si Inday nga maglagaw bisan curfew hours, mahimo siya mapreso sa sulod sang 30 ka adlaw tubtob anum ka bulan.

Una na nga nagpabutyag sang kabalaka si Daisy kon sin-o ang magatatap sa iya anum ka kabataan, lakip si Inday, kag sa iya iloy matapos siya ginkasuhan. Ginpanindugan man ni Daisy nga wala siya nagkulang sa paglaygay kay Inday pero wala nagapasaway kag nagalagaw gid kag nagapauli lang sa ila balay kon san-o niya gusto.

Si Daisy ang nagabaligya sang utanon sa Iloilo Terminal Market kag nagabulig man ang iya live-in partner. (JoMaque)