2 pilason sa pagbunggu-anay sang tricycle kag motorsiklo sa Molo
Iloilo City – Duha ang pilason sang nagbunggu-anay ang tricycle kag motorsiklo sa Lopez Jaena Street, Barangay Kasing-Kasing pasado las 12 kaina sang kaagahon, Disyembre 5.
Ginkilala ang driver sang tricycle nga si Richard Carman, 44 anyos sang Brgy. Tanza Timawa, City Proper, nga may injury sa wala nga kamot pero nagpamalibad nga magpa-ospital.
Ginkilala naman ang driver sang motorsiklo nga si Hernan Peñaverde, 21 anyos sang Brgy. Lumbo, Pototan nga may bagras sa ulo kag minor injury sa wala nga paa.
Suno kay PO3 Ricky Ardamoy, traffic investigator sa Molo Police Station, nagapakadtu sa Iloilo Terminal Market ang tricycle samtang nagapadulong naman sa Molo plaza ang motorsiklo sang naaksidente.
Ginpahayag ni PO3 Ardamoy nga wala sang helmet kag nagapanimaho pa sang makahulubog nga ilimnon ang driver sang motorsiklo. (AGB/JGM)