Councilor Joshua Alim, mapadala sang kopya sang minutes sang session sa konseho kag iya privilege speech sa Manila Standard kasunod sang ginpahayag misleading headline sang pahayagan sa isyu sang power distribution
Iloilo City–Plano ni Councilor Joshua Alim nga padal-an sang kopya sang minutes sang ila session sa City Council kahapon, Disyembre 4, ang Manila Standard agud ipahibalo ang ila reklamo sa ginpahayag misleading headline sang newspaper.
Lakip na sa ipadala ni Alim ang iya ginhimo nga privilege speech kahapon nga nagakuwestyun sa headline sang amu nga pahayagan.
Gin-athag sang konsehal nga wala pa nakadesisyon ang konseho ukon nakahatag sang collective stand matapos ang presentation sang MORE Electric and Power Corporation sa City Council.
Ginkonsulta ni Alim si Councilor Plaridel Nava bilang floor leader angut sa iya plano kag nagpasugot man ang konsehal.
Sa news item nga gin-publish sang Manila Standard sang Disyembre 2, nasulat nga headline “Iloilo’s Local Government Officials Reject More” kag gin-quote sa kaundan sanday Vice Mayor Jeffrey Ganzon kag Councilor Love-Love Baronda.
Sa amu nga balita, ginhambal ni Ganzon nga “carpetbagger” ukon oportunista ang MORE samtang gintawag naman ni Baronda nga “super ambitious” ang presentation sang MORE.
Gin-ako naman ni Ganzon nga naggamit siya sang tinaga nga “carpetbagger” ang MORE pero wala siya nakapa-interview sa national media.
Mas gusto man sang bise alkalde nga local player ang maga-distribute sang elektrisidad .
Gin-athag man ni Councilor Baronda nga observation lang sang presentation sang MORE ang iya ginhambal. (AGB/JGM/JV)