Groundbreaking kag capsule-laying ceremony sang Jalaur Multi-Purpose Project, ginhiwat sa Calinog

Calinog, Iloilo — Ginhiwat ang Ground breaking and Capsule-Laying Ceremony subong nga adlaw, Pebrero 27, sang Jalaur Multi-Purpose Project, ang ginakabig nga pinakadako nga proyekto sang National Irrigation Association ukon NIA sa Visayas nga nahamtang sa Brgy. Agcalaga, Calinog.

Las 10 kaina sang aga, ginlubong ang symbolic nga time capsule nga ginpangunahan nanday Senator Franklin Drilon, Gov. Art Defensor, NIA Administrator Ricardo Visaya, miyembro sang Korean government, pati man ang pila ka miyembro sang construction company nga maga-obra sang proyekto halin sa Korea.

Lunsay pagpasalamat ang unod sang speech sang gobernador kag senador bangud mapadayon ang proyekto sa pihak sang pagpamalabag sang iban nga sektor.

Pagkatapos sang programa, may ginhiwat nga press conference sa diin nagpasalig si Mr. Gerardo Corsiga, current project manager sang JRMP II, nga indi sila pagkulangon sa aggregates nga amo ang mayor nga materyal sa iga-construct nga dam.

Ginahanda na nila ang MOA upod sa provincial government agud nga matawhay sila nga makakuha sang mga bato kag balas sa kabukiran sang probinsya kun kulangon.

May paandam naman si Sen. Drilon sa mga may plano nga magpamalabag sa paghuman sang proyekto.

Suno sa senador, dapat mahuman gid ang proyekto sa gintalana nga tyempo kag magamit sang husto ang budget para diri.

Ginalauman nga masuguran na ang proyekto sa Marso subong nga tuig kag matapos sa September 2022. (AGB/KJT)