Nasapwan nga patay sa higad sang baybayon sa Culasi, Ajuy nakilala na

Ajuy, Iloilo (UPDATE 2) — Nakilala na ang lalaki nga nasapwan nga patay sa higad sang baybayon sa Barangay Culasi.

Suno kay Patrolman Aaron Animas, imbestigador sang Ajuy Police Station, ginkilala ang bangkay kay Remjohn Demapanag, 27-anyos sang Barangay Alacaygan, EB Magalona, Negros Occidental.

Ang iloy mismo ni Demapanag ang nagkilala sa iya paagi sa singsing sa iya kamalingking sa wala nga kamot, mga panapton kag bukol sa tuo nga abaga.

Ginpahayag nagkadto si Demapanag sa iya utod sa Aldeguer, Sara kag papauli na sang Pebrero 27 sang nadula kag nabalitaan na lang nga patay na.

NAGLANGOY PABALIK SA NEGROS OCCIDENTAL?

Ginapatihan nagtuyo maglangoy pabalik sa Negros Occidental si Demapanag suno sa pulis.

Pebrero 27 sang gindul-ong si Demapanag sang iya pakaisa sa puerto sa Barangay Culasi, Ajuy agud magpauli na ugaling wala na naabtan ang byahe sang sakayan.

Ginpahayag nagpalagyo naman si Demapanag bangud luyag gid niya nga magpauli sa amo nga adlaw.

Pasado las singko sang hapon sang Pebrero 27 sang ulihi nga nakita si Demapanag nga nagalakat lakat sa puerto.

May nervous breakdown ang napatay suno sa pulis. (JoMaque)