Kapin 300 ka mga job hires sa Western Visayas Sanitarium sa Sta. Barbara, wala masweldohan sang duha na ka bulan
Sta. Barbara — Wala masweldohan sang duha na ka bulan ang kapin 300 ka mga job hires sa Western Visayas Sanitarium.
Suno kay Mr. Soternino Ngipen, administrative officer sang WVS, gin-implementar nila ang bag-o nga rate sang sweldo sang mga job hires sandig man sa Joint Circular No. 1 series of 2018 sang Civil Service Commission, Commission on Audit kag Department of Budget and Management rason na-delay ang sweldo.
Base sa amo nga circular, ang sweldo sang mga job hires ang dapat kasubong sang sweldo sang comparable positions sa gobyerno kag sang premium nga tubtob sa 20% sang sweldo sugod Enero 1, 2019.
Sa 298 ka mga job hires nga apektado, ginpahayag 70 sa ila ang nurses, 20 ang doktor samtang administrative support staff ang nabilin.
ANO ANG GINADUSO?
Gina-implementar sang tagdumalahan sang WVS ang bag-o nga rate sang sweldo sang mga job hires sa ospital kasunod sang circular sang CSC, COA kag DBM.
Halin sa P9,000 nga sweldo sang job hires nga mga nurses sang nagligad nga tuig, ginhimo ini nga P20,000 ukon equivalent sang Nurse 1 sa plantilla position; P65,000 naman para sa mga doktor ukon equivalent sang Medical Center Chief 1.
Sa mga job hires sa administrative support staff nga ginalakipan sang mga workers sa clerical, maintenance, guards kag utility, ginaduso ang Salary Grade 1 ukon P10,510 sa mga job hires nga may eligibility sa CSC samtang P400 naman kada adlaw ang sweldo sang wala sang eligibility.
Bisan sang November 9, 2018 pa gin-issue ang amo nga circular, Enero na sang nabaton ini sang tagdumalahan sang ospital suno kay Ngipen.
NAG-ABSENT ANG MGA EMPLEYADO
Ginkunfirmar ni Ms. Cecilia De Luna, head sang Health Information Management (Records) sang ospital, nga absent subong nga adlaw, Marso 15, ang tanan nga mga job hires sa ila opisina.
Suno kay De Luna, wala nagpahibalo sa iya ang walo ka mga personnel.
Ginpabutyag naman sang mga personnel nga wala na gid sila sang kwarta bisan inugpamasahe pakadto sa ospital rason nag-absent.
Ginbuligan sang iban nga mga personnel ang HIM sa pag-atender sa ila mga kliyente.
PAGHANGOP, PRAYORIDAD
Nagpangayo sang paghangop ang tagdumalahan sang WVS sa natungdan nga mga personnel sang ospital nga apektado.
Suno kay Ngipen, na-intindihan nila ang sentimiento kag sitwasyon sang mga job hires apang ginakabalak-an man sang tagdumalahan sang ospital ang pondo sa pagsustenir sa sweldo.
Ginapanan-aw nga masobra P5-Million ang kinahanglanon nga pondo sa implementasyon sang bag-o nga rate sang sweldo sang mga job hires sa WVS suno kay Ngipen.
Kapin P10-Million ang kita sang WVS kada bulan kag diri ginakuha ang pondo sang sweldo sang mga job hires.
Ginapa-abot naman nga masweldohan sa masunod nga semana ang mga job hires. (JoMaque)