Mga barangay kapitan sa Iloilo, ginpahanumdom ni Liga President Irene Ong nga magsumiter sang BADAC report

Iloilo City — Ginpahanumdom ni Liga President kag Ex-Officio City Councilor Irene Ong ang mga punong barangay nga magsumiter sang ila Barangay Anti-Drug Abuse Council report kada bulan.

Kasunod ini sang natukiban sang Aksyon Radyo Iloilo nga indi consistent ang pila ka BADAC sa pagsumiter sang ila report kada bulan kay Mayor Joe Espinosa nga chairman sang Iloilo City Anti Drug Abuse Council.

Suno kay Ong, wala siya sang ideya kon sin-o nga BADAC ang nagasunod sa requirement bangud wala man siya napahibalo sang ICADAC.

Base sa record sang Secretariat sang ICADAC, lima ka mga barangay sa City Proper ang wala naka-submit sang BADAC report sang Enero samtang siyam sang Pebrero. Lima naman ka barangay sa Mandurriao ang wala nakasumiter sang Enero kag Pebrero; tatlo ka mga barangay sa Arevalo kag duha ka mga barangay sa Molo. Sa Lapaz kag Jaro, mas mataas pa ang numero sang mga barangay nga wala nakasumiter sang ila BADAC report sang Pebrero ipaanggid sa mga nakasumiter.

Sa Dangerous Drugs Board resolution number 3 series of 2017, dapat magsumiter ang BADAC sang ila report sa CADAC ukon Municipal Anti Drug Abuse Council kag DILG kada bulan. (AGB/AT)