Ginapatihan lider sang NPA, patay sa engkuwentro sa Alimodias, Miag-ao

Miag-ao, Iloilo – Patay ang ginapatihan lider sang New Peoples’ Army sa encounter sa Sitio Burak, Barangay Alimodias las 4 kaina sang kaagahon, Marso 24.

Suno kay Lieutenant Colonel Sisenando Magbalot Jr, commanding officer sang 61st Infantry Battalion sang Philippine Army, magluwas sa encounter, na-overrun man sang mga suldado ang temporary harboring site sang NPA sa nasambit nga lugar.

Mga miembro suno sa iya sang grupo ni Joven Ceralvo alyas Ka Lex sang Suyak Platoon, Southern Front-Komiteng Rehiyon Panay ang naka-engkuwentro sang mga suldado.

Wala naman sang napilasan sa mga suldado. Narecover sa lugar ang M16 rifle, land mines, mga bayo, subversive documents, kag NPA-NDF flags.

Gin-imbestigaran naman sang mag suldado ang tatlo ka lalaki bangud sang ila presensya sa lugar sang nagluntad ang engkwentro.

Ginahibalo pa sang mga suldado ang identity sang napatay nga ginabanta 5’2 ang kataason, mabukod ang panglawason kag ginapatihan 35-40 anyos ang edad.

Matandaan, nagluntad ang engkwentro sa tunga sang mga suldado kag ginapatihan NPA members sa Brgy. Mulangan, Igbaras kag San Remigio sa Antique sang damlag lang. (JoMaque)