Porsyon sang Mandaue Foam Factory sa Pavia, nasunog

Pavia, Iloilo — Nasunog ang factory nga gina-obrahan sang mga foam ng Mandaue Foam Factory sa Barangay Mali-ao, Pavia kaina sang hapon, Abril 16.

Suno kay Michael Sausa nga residente sang Barangay Mali-ao kag naga-istar malapit sa Mandaue building, nagsugod ang sunog alas-dos sang hapon.

Nagresponder ang mga bombero sang Bureau of Fire Protection-Pavia kag kaingud nga mga banwa lakip na ang mga volunteer fire brigades sa Iloilo City.

Suno naman sa mga empleyado sang Mandaue Foam nga na-interview sang Aksyon Radyo, nag-short circuit ang slicer machine nila rason sang pag-ibwal sang kalayo.

Wala na naglaton sa main building kag showroom ang kalayo.

Gindeklarar nga under control ang sunog mga alas-kuwatro sang hapon ni Fire Inspector Arnold Demaano, municipal fire marshal ng Pavia.

Padayon nga gina-imbestigaran sang BFP kon ano gid ang ginhalinan sang sunog kag kon pila ang kahalitan. (AGB)