Mga pumuluyo sa San Enrique, nagreklamo nga nagbaho kag ‘brownish’ ang tubig sa ila suba; Brgy. Official nagapati nga posible nag-leak ang waste water halin sa planta nga malapit sa suba
San Enrique, Iloilo — Nagreklamo ang mga pumuluyo sang Barangay Imbang Pequeño nga mabaho ang tubig nga naga-ilig sa ila suba magluwas pa sa pagduag brownish sang tubig sini.
Suno kay Imbang Pequeño Barangay Kagawad Bernie Marce, nagpadala na sila sang sulat sa Universal Robina-Sugar and Renewables Division (Passi) angut sini sang Abril 2.
Nagpasalig naman ang tagdumalahan sang UR-SURE suno kay Marce nga aksyonan nila ang reklamo paagi sa pagsemento sa leakage kag pagbutang sang lime ukon apog para indi magbaho ang suba.
Nagapati si Imbang Pequeño Barangay Kagawad Dennis Calixto nga may leak ang facility sang UR-SURE rason posible nag-impon ang ila waste water sa suba.
Nahamtang malapit sa suba ang facility sang nasambit nga kumpaniya.
Wala pa nakahatag sang opisyal nga pahayag ang UR- SURE angut sini.
‘MAY GIN-DISCHARGE SILA’
Una na ginpahayag ni Engr. Janer Deaño, plant manager sang South Balibago Resources Inc., nga nadiskubrehan nila nga baho bagaso ang ila water supply nga nakuha sa ila source sa Pototan nga halin sa Jalaur River.
Dugang niya, posible may gin-discharge ang UR-SURE sa suba rason nagbaho bagaso ang tubig sa suba.
Ang UR-SURE ang nahamtang malapit sa suba, ang amo nga suba ang nakakonekta naman sa Jalaur River.
‘MAY NAG-ULA SA SUBA’
Magluwas sa South Balibago Water Resources Inc., nagpa-athag man ang Metro Iloilo Water District sa ila mga konsumidor bangud sang ginpahayag pag-‘brownish’ kag pagbaho sang ila water supply sang April 10.
Suno kay MIWD Officer-In-Charge Marjo Castro, may nag-ula sang wala pa mahibaluan nga butang ukon substance sa suba nga ginakuhaan naman sang water supply sang ila bulk water suppliers nga Prime Water kag Flo Water.
Sa pagpangusisa sang Aksyon Radyo Iloilo, lapitanay lang ang water source sang South Balibago Water Resources Inc. kag bulk water suppliers sang MIWD.
Gina-imbestigaran pa ini sang Department of Environment and Natural Resources ukon DENR 6. (JoMaque)