PRO 6 Director John Bulalacao, naghatag sang ‘leksyon’ sa mga pulis sa iya farewell visit sa IPPO

By: JoMaque | Hunyo 22, 2019, 9:53 AM

Via Aljohn Torreta

Sta. Barbara — Ginhatagan sang ‘leksyon’ ni Police Regional Office 6 Director Police Brigadier General John Bulalacao ang mga pulis sa iya farewell visit sa Iloilo Police Provincial Office subong nga aga.

Suno kay Bulalacao, nangin madinalag-on ang iya kapin 35-anyos nga career sa Philippine National Police kag Philippine Constabulary bangud sang mga ‘leksyon’ nga ginasunod niya.

Ini ang pagproteher sang mga pulis sa ila reputasyon sa serbisyo, pagmentinar sang disiplina, dedikasyon sa pag-obra kag pagpati sa gahum sang pagpangadi.

Nagapati si Bulalacao nga mangin madinalag-on ang career sang mga pulis kun sundon nila ang ginpanugyan niya nga mga ‘leksyon’.

‘EMOSYONAL SA PAGPASALAMAT’

Nangin emosyonal naman si Bulalacao sa iya speech sa pagpasalamat sa IPPO.

Ginpahayag niya nga pinakadako ang kontribusyon sang IPPO sa kadalag-an kag pagsikat sang PRO 6.

Nagabisita ang regional director sa tanan nga mga provincial police offices sa rehiyon para personal nga magpasalamat sa ila kooperasyon kag pagsuporta sa iya liderato.

Mayo 2018 sang nagpungko si Bulalacao bilang director sang PRO 6 kag natalana nga magretiro sa Hunyo 27.

Ginakasubo ni Bulalacao nga magatakop na ang iya liderato bilang regional director apang ginakalangkagan nga makaupod na niya ang iya pamilya.

‘ANO ANG SIKRETO SA KADALAG-AN?’

Nagapati si Bulalacao nga nangin madinalag-on ang iya liderato bangud sang suporta sang mga pulis kag komunidad sa iya.

Madamo sang paghangkat nga gin-atubang ang PRO 6 suno kay Bulalacao apang nalampasan kag nasarangan ini bangud sang maayo kag madasig mag-aksyon sang mga pulis niya.

Ginhatagan man pagtamod ni Bulalalacao ang kooperasyon kag pagsalig sang publiko sa paghatag sang mga impormasyon sa iya paagi sa ginhatag niya nga personal number.