Mangingisda, na-rescue sang gin-anod halin sa Calaparan, Arevalo tubtob sa Boulevard, Molo

By: JoMaque| August 10, 2019, 10:30am

Iloilo City – Luwas ang mangingisda nga nakita nga nagapa-utaw-utaw sa kadagatan sang Boulevard, Molo halin sa Calaparan, Arevalo.

Una na ginpahayag ni Tanod Wilfredo Francisco sang Calumpang, Molo nga isa sa mga nagbulig rescue, tuman ka dalagku sang balud gani nadugayan ang pag-rescue kay Reynaldo Abalajin, 72 sang Zone 10, Calaparan, Arevalo.

Suno naman kay Chief Petty Officer Bernard Bernasol sang Coast Guard Iloilo, ginlangoy ni Abalajin ang buya (buoy) nga may fishing cage sa idalum sa pagpasimpalad nga may isda nga nahulik.

Pero gulpi lang nga nagdalagku ang balud kag gin-anod si Abalajin tubtob sa Boulevard, Molo sa diin nakapangayo siya sang bulig.

Ginlangoy pa si Abalajin sang iya bata, pero indi niya man mapalapitan ang iya amay bangud mabaskug ang huyop sang hangin kag dalagku ang balud.

Nagresponder ang Coast Guard upod sa Unicorn Rescue Volunteer kag gin-rescue si Abalajin.

Indi pa pagbuy-an ni Abalajin ang buya suno kay CPO Bernasol pero ginhambalan siya nga buy-an bangud mabug-at.

Gindala sang ICER sa ospital si Abalajin.