Mga puerto, paluparan sa Iloilo province, ginabantayan agud wala sang makalusot nga buhi nga baboy kag swine products halin sa mga lugar nga apektado sang ASF

By: Aine Grace Bravo | September 17, 2019

via Hotline

Iloilo — Hugot nga bantayan ang mga puerto kag paluparan sa Iloilo agud masiguro nga indi makasulod ang buhi nga baboy kag iban pa nga swine products nga affected sang African Swine Fever (ASF).

Ini ang pahayag ni Governor Arthur Defensor Jr matapos ginpatuman ang administrative order number 4 sang Bureau of Animal Industry (BAI) bangud sa kaso sang ASF sa pila ka lugar sa Luzon.

Suno sa gobernador, hugot nga usisaon ang mga nagasulod nga produkto.

Indi makasulod sa Iloilo ang mga baboy halin sa mga pungsod nga affected sang ASF kag probinsiya sa pungsod nga nagpositibo sa virus.

Gin-athag ni Defensor nga mahimo man gihapon makapasulod sang produkto, pero dapat indi maghalin sa mga lugar nga apektado sang ASF nga gintumod sang national government kag may nagakaigu nga dokumento kag permits halin sa BAI.

Kinahanglan man suno sa gobernador nga magpaguwa sang executive order angut dire agud mangin pulido ang implementasyon.