Dugang nga mga ex-convicts nga nag-surrender sa pulis kahapon, pagadal-un sa penal institution sa Occidental Mindoro subong nga Setyembre 20

By: JoMaque | September 20, 2019, 8:35am

Iloilo City — Ginpasiguro ni Police Lt. Colonel Joem Malong, spokesperson sang Police Regional Office 6 nga madayon ang pagdala sa mga ex-convicts sa Sablayan Prison and Penal Farm sa Occidental Mindoro subong nga adlaw.

Suno kay Malong, wala sila sang may gintalana nga oras sa pagdala sang mga ex-convicts bangud man sa ila seguridad.

Plano suno sa iya sang PRO 6 nga maghulam sang bus sa BJMP 6 para sakyan sang mga surrenderers pakadtu sa penal institution.

Apang nakadepende pa ini sa approval ni PRO 6 Director Rene Pamuspusan.

Tubtub las 7 kagab-i, 66 sa 149 ka ex-convicts ang nag-surrender sa Western Visayas.

Ginpahayag man ni Malong nga subject man sa approval sang PRO 6 director kon pasugtan nga maka-upod ang pamilya sang mga ex-convicts pakadtu sa Sablayan Prison ang Penal Farm.

Mierkules sang gab-i pa ginbiyahe sang BJMP 6 sa Occidental Mindoro ang 28 ka mga ex-convicts nga gin-kustodiya sa Iloilo District Jail Male Dormitory sa Nanga, Pototan.