Iloilo Provincial Police Office, istrikto nga ipatuman ang ‘one strike’ policy sa mga chiefs of police nga indi makasolbar sang stray bullet incidents sa iya area sa pagsug-alaw sang bag-ong tuig

By: JoMaque | Disyembre 31, 2019, 10:23am

Iloilo — Istrikto nga ipatuman sang Iloilo Police Provincial Office (IPPO) ang “one strike” policy sa pagsug-alaw sang bag-ong tuig.

Ini ang wala-untat nga pagpahanumdom sa mga chiefs of police sa probinsya suno kay IPPO Deputy Provincial Director for Administrator Police Lt. Colonel Ruby Gumban.

Suno kay Gumban, sayluhon sa iban nga assignment ang hepe nga mapaslawan sa pag-solve sa sulod sang 24-oras sang stray bullet incident sa ila lugar nga magaresulta sa pagkapilas ukon pagkapatay sang biktima.

Ang one-strike policy naghalin sa PNP headquarters kag ginmando sang Disyembre 13.

Una na ginpahayag sang Police Regional Office 6 nga Disyembre 24 sang gab-i tubtub Disyembre 25 kag Disyembre 31 sang gab-i tubtub Enero 1 ang covered period sang one-strike policy.

Kinahanglan makilala, madakpan kag mapasakaan sang kaso sang pulis ang suspetsado para makabig nga ‘solved’ na ang kaso.

Ikonsiderar naman sang pulis kun ‘cleared’ ang kaso kun makilala kag mapasakaan sang kaso ang suspetsado.