Kahalitan nga ginbilin sa sector sang agrikultura sang bagyo Ursula sa Iloilo province, naglab-ot sa P104-million — PDRRMO

By: JoMaque | Disyembre 31, 2019

Naglab-ot sa 104 million pesos ang ginbilin nga kahalitan sa sector sang agrikultura sang bagyo Ursula sa probinsya sang Iloilo, base sa assessment sang Iloilo Provincial Disaster Risk Reduction and Management Office (PDRRMO).

Suno kay Dr. Jerry Bionat, Executive Director sang PDRMMC, mga humay ang kadam-an nga nahalitan.

459.8 hectares sang humayan sa Ajuy kag 443 hectares sa Estancia ang ginhalitan sang bagyo nga may kabug-usan nga balor nga 61 million pesos.

Ginabanta sa P34 million naman ang balor sang 223 hectares sang maisan nga ginhalitan sang bagyo.

Samtang P1.1 million ang kahalitan sa livestocks kag poultry sa probinsya.

Tuman nga nahalitan sang bagyo Ursula ang Northern Iloilo, Capiz kag Aklan sa Western Visayas sang naglaslas ang bagyo.

Sa Capiz, naglab-ot sa P136 million nga balor sang humay, mais kag iban pa nga pananum ang nahalitan.

Sa Antique, P6 million ang damage sa agricultural crops samtang P19,728 ang kahalitan sa Negros Occidental.